कविता

                                बिछोड रमाइलो छ 

अतित सम्झेर हाँस्न पाइन्छ

दुखाएर मन रुन पाइन्छ 

सम्झनामा हराउन पाइन्छ 

त्यसै कहाँ हुने हो र 

बिछोड रमाइलो । 

तिमी सोच्छौ

अब 

धर्ति नै उल्टिन्छ कि 

आकास खस्छ कि 

त्यस्तो कहाँ हुन्छ ?

छुट्टिनु भनेको 

झन् मायाँ गर्नु होइन भने 

तिमी पनि मुटु छामी हेर त । 

एउटा मीठो कल्पना हुन्छ 

सँगै भएको आभाष हुन्छ 

मिलनमा त्यो 

सम्भव होला नहोला 

मायाँ नै बराबर होला नहोला 

त्यसैले त बिछोड प्यारो छ

बिछोड रमाइलो छ ।